A Cig-Saúde asegura que este mes rematan 4 pediatras e poderían vir outras profesionais para Monforte, pero “nunha reunión mantida co sr. Ares ofrecéronse condicións indignas para calqueira profesional. Tiñan que facer 5 días en Monforte en xornada intensiva e o resto de traballo na área de Vigo. A xornada consistía en facer 58 horas seguidas, ainda que as gardas non son presenciais”.

O sindicato asegura que as dúas facultativas actuais acabarán marchando polas condicións actuais, coa correspondete perda de servizos para a infancia nesta zona e alertan de que a situación se agravará no verán.

Nas outras especialidades denuncian tamén a falta de especialistas. En Oftalmoloxía hai actualmente dúas facultativas, cando tamén debería haber 4. En Neuroloxía actualmente non hai neurólogo no Hospital, “vindo de Lugo un especialista 4 días á semana que chegou a vir dous días á semana”.

En Cardioloxía cóntase con dúas profesionais, “pero non se recuperaron os ingresos destes pacientes en Monforte. En Dixestivo agora mesmo cóntase cun profesional e faltaría un. “Aquí estamos moi atentos xa que hai rumores de que queren amortizar unha praza” explican desde o sindicato que remata informando de que están completas as plantillas de Psiquiatría e RX.