A cantidade e calidade dos traballos presentados dificultou a tarefa de elección, decidindo finalmente o xurado outorgar premio e, por tanto, recoñecemento público, a catro deles. O primeiro premio será o cartel anunciador do Folión de carros 2026 e o accésit será a imaxe para a portada da revista que todos os anos edita no mes de agosto a Asociación Amigos do Folión con motivo do Folión de carros.

O xurado deixou constancia da extraordinaria capacidade creativa e habilidade técnica dos traballos premiados para establecer sinerxias entre a cultura tradicional e as formas de expresión artística contemporáneas. Así mesmo, o xurado comunicou a todo o alumnado que calquera destas creacións artísticas, tanto as catro seleccionadas como outras tantas non premiadas, representan perfectamente todo canto significa o Folión de carros como ben de interese cultural.

• O accésit, que será a imaxe seleccionada para a portada da revista, corresponde co traballo presentado por Leonor Pacheco Gay.
• O terceiro premio foi para o traballo presentado por Sara Valentina Lugo Martínez.
• O segundo premio foi para o traballo presentado por María Ledo Alonso
• O primeiro premio, que será o cartel anunciador do Folión de carros 2026, foi para o traballo presentado por Noemí Cortiñas López.

Os diplomas e trofeos conmemorativos ás alumnas premiadas foron entregados por Manuel Vázquez Regal, presidente da Asociación Cultural Amigos do Folión; Iria Castro Fernández, deputada de cultura da Deputación de Lugo; Manuel Diéguez Carballo, tenente de alcalde de Chantada; e Javier Conde Vázquez, director do IES Lama das Quendas. Todas as obras feitas polo alumnado estarán expostas no mes de agosto na Casa da Cultura de Chantada.