Aproveitando que se vén de presentar en Quiroga un novo mural, obra de Román Linacero e dedicado a Enrique e Isabel, veciños da aldea dos Albaredos que perderon a súa casa no incendio do pasado verán, o QTC (Quiroga Trail Challenge) fixa a súa mirada nos afectados deste ano.

Nun comunicado que fan a través das redes sociais, din: “Hoxe o noso pensamento está con todos os afectados polos incendios que están a arrasar España. Miles de persoas evacuadas, pobos enteiros ameazados, montes e fogares que desaparecen en horas. Sabemos o que é. Sabemos o que se sente. Quiroga viviu o seu propio incendio o verán pasado, e aínda levamos esas cicatrices“.

Despois de presentar o devandito mural en Quiroga, impulsado pola asociación local Quiroga en Marcha e que homenaxea “a quen perdeu todo e a quen loitou —bombeiros, brigadistas, voluntarios e veciños— para que o lume non se levase máis” a organización aproveita este momento para mandar apoio e ánimo a quen hoxe están a vivir o mesmo. En palabras deles “forza aos pobos afectados e forza a quen está en primeira liña apagando o lume. Este mural lémbranos que despois do lume quedan as cinzas de casas e bosques pero tamén queda un gran pesar no fondo dos corazóns. Coa xente, coa memoria e cos nosos bosques”.