Margaride volverá darlle protagonismo ás súas covas (antigas explotacións auríferas romanas), no lugar coñecido como ‘complexo aurífero do Medo’. Esta ubicación acollerá a ‘Festa do ouro’, un evento que organiza a Asociación de Veciños e Veciñas de Margaride e que lembra a pegada romana nas súas terras.
Esta romaría castrexo-romana, que alcanza este ano a súa XIV edición, xunta á veciñanza e visitantes con diferentes actividades e un xantar no que coinciden, “xuntos pero non revoltos”, castrexos e romanos. Na xornada festiva non falta a música, os xogos para todas as idades e o apartado divulgativo-cultural.
PROGRAMA 2026
Ás 11:30 h haberá unha Misa en latín e ás 12:00 h terá lugar a tradicional visita ás adegas de Margaride coa compañía musical da formación Aikirindo Gaitukada.
Despois, ás 14:00 h celebrarase o Xantar no campamento Castrexo e Romano que está nos Medos, lugar emblemático da celebración que mantén vestixios históricos así como tamén construcións elaboradas polos veciños que lembran o paso dos romanos por Margaride.
Ás 17:30 h haberá unha actuación de maxia a cargo do Mago Castrexo Xulio Merino, e a continuación xogos entre castrexos e romanos. Un deles con moito tirón é o xogo da chave. Despos tamén se fará o esperado xogo para a cativada “na busca do ouro’.
18:30 h Conferencia nunha Cova dos Medos a cargo de Manuel Cao Rodríguez, mestre xubilado, escritor e divulgador natural e residente en San Clodio. O título da charla é “A chegada ao Lor do ferrocarril”.
Música con DJ Kola a partires das 20:00 h ata e ata as 22:00 h que será a cea no campamento para repoñer forzas.
Rematando a xornada festiva, ás 23:00 h. ‘Nox Terrorem’: rituais celtas con Rumoris Fabulam Veri (Lenda, fábula ou verdade), Rito da boa sorte, e Queimada para todos. Como fin de festa, ás 00.00 h volverá DJ Kola.
