Julio Ferrín naceu na Ribeira, en Quiroga, e tras vivir uns anos en Arteixo decidiu facer a viaxe de volta cara a súa Quiroga natal, concello no que dende hai uns anos rexenta unha froitería.

De pequeno empezou a sentir atracción pola música, feito do que demos conta neste mesmo medio alá polo ano 2020, e xa no instituto os seus cantos nas duchas escoitábanse alén dos vestiarios e eran aplaudidos pola comunidade educativa do centro. Despois, no 2019, conta Julio que lle deu por usar unha aplicación de karaoke para cantar e comezou a difundir as súas interpretacións polas redes con notable éxito de seguimento. Neste mesmo ano empezou tamén a ser contratado para amenizar diferentes eventos e despois da pandemia gravou o seu primeiro disco, traballo no que recolleu varios temas e co que decidiu destinar os beneficios das vendas a comedores sociais de Galicia.

No panorama televisivo pasou polo programa Bamboleo e tamén no Quen canta aquí?, ambos da Televisión de Galicia. E xa máis recente, no ano 2025, foi a súa participación no casting de A Liga dos Cantantes Extraordinarios. “No casting gusteilles moito e dixéronme que sería unha oportunidade boa que me colleran no Recantos”, di Ferrín.

CAMIÑO DE LUAR

O cantante quirogués andaba preto de alcanzar un novo programa televisivo e no 2026 xurdiulle a posibilidade de participar no casting de Recantos para a nova edición no Luar 2026-2027. Apuntouse e tivo o primeiro casting no Bierzo, concretamente no Teatro Municipal Vergidum de Ponferrada. Foille ben, pasouno, e deulle dereito a participar na Gala Final de Recantos que se fixo no Teatro Jofre de Ferrol a principios deste mes de setembro. Tamén lle foi ben e saíu escollido para formar parte dos 20 recanteiros que participarán no concurso de canto desta tempada no Luar.

A estrea de tempada do Luar foi o pasado venres, 18 de setembro, día no que se fixeron as presentacións dos/as recanteiros/as aínda que Julio non tivo a oportunidade de participar coas súas primeiras interpretacións en directo. “A experiencia está moi ben e estou moi ilusionado”, di Ferrín comentando que vai coa intención de pasalo ben e seguir aprendendo no mundo da interpretación. Agora quedan por diante as diferentes fases clasificatorias e ver ata onde pode chegar, expectativas que seica non lle quitan o sono e tendo claro que ten que atender a súa froitería e encaixar horarios profesionais e familiares coa dinámica de Recantos todos os venres.

“A experiencia está moi ben e estou moi ilusionado”

Para rematar a nosa conversa preguntámoslle pola repercusión que está tendo a súa participación e se recibiu moitas felicitacións. “A verdade é que estou flipando. Sorprendeume moito a xente que atopei o venres no plató que non me coñecía de nada e xa me parou para felicitarme. Unha señora do público díxome ‘es o que máis me gusta de todos’… Aínda non empecei, e xa me din estas cousas”, comenta Julio.