O lume que se iniciaba o xoves, 5 de setembro, na parroquia de Seoane, no Concello de Monforte, dábase por extinguido este luns, día 9 ás 21.19. Segundo as últimas estimacións afectou 465 hectáreas, das cales 255 son de monte arborado e 210 de monte raso. Na súa extinción participaron 3 técnicos, 15 axentes, 77 brigadas, 30 motobombas, 6 pas, 16 helicópteros e 6 avións.
E mentres se pechaba este incendio aparecían novos focos en Monforte e Quiroga. O de Monforte comezou sobre as 19:00 h. deste luns, día 9, a carón da estrada LU-617 que comunica Monforte con Escairón. Segundo contan testemuños do mesmo, o lume prendeu en dous focos, un na ‘zona da fonte’ -preto do barrio do Eivedo- e outro na coñecida como ‘zona da curva’.
A estrada indicada tivo que ser cortada, de igual xeito que se fixo hai poucos días no gran incendio de Seoane que afectou a unha extensión de 465 hectáreas, por mor do fume e para deixar traballar aos servizos de extinción.
A voz de alarma foi dada polos veciños e veciñas, que intentaron apagalo ata que chegaron varias brigadas forestais e os bombeiros de Monforte, achegándose ao lugar tamén patrullas da Policíca Local, Policía Nacional e Garda Civil. Tal como nos relata un veciño de Moreda, “por sorte ás 20:30 h estaba apagado… alguén que nos quere mal”.
Novos incendios en Quiroga e ribas de sil, outra vez na contorna da N-120
Cando semellaba ter rematado o pesadelo dos contínuos incendios nas marxes da N-120, na contorna do sur de Quiroga e Ribas de Sil, o lume volveu facer acto de presenza.
Este pasado domingo 8 de setembro na estrada que comunica Peites -Ribas de Sil- coa N-120 declarábase un incendio ao mediodía, foco que por sorte foi apagado ao pouco tempo.
Pero non queda aí a cousa, porque un día despois, este pasado luns 9 de setembro, grupos de whatsapp alertaban doutro foco declarado xa pola noite na marxe esquerda do tramo de N-120 e dirección A Rúa, no tramo entre Bendilló e Montefurado.
