Un camioneiro resultou ferido na tarde deste martes en Pantón tras saír da vía e envorcar o vehículo co que circulaba.
Para prestar asistencia ao condutor foi necesaria a intervención dos Bombeiros de Monforte de Lemos que, aínda que descartaron o emprego do material de excarceración para liberar ao ferido, ao atoparse accesible, colaboraron cos profesionais sanitarios para introducilo na ambulancia.
Segundo informa o 112, o accidente tivo lugar no punto quilométrico 543,5 da N-120, ao fío das 17,30 horas. Varios particulares contactaron para dar conta do sinistro.
O CIAE 112 Galicia solicitou a intervención de Urxencias Sanitarias de Galicia-061, dos Bombeiros de Monforte, da Garda Civil de Tráfico e do servizo de mantemento da estrada.