Os Bombeiros de Monforte liberaron esta tarde a unha persoa que quedara atrapada por unha perna cunha máquina de cavar na localidade lucense de Sarria. O ferido foi posteriormente trasladado ao hospital en helicóptero.

Os feitos ocorreron sobre as 13,30 horas deste luns no lugar da Agra, en Corvello. Segundo a persoa que chamou ao 112, un home necesitaba axuda tras quedarlle unha perna atrapada nunha máquina agrícola. Concretamente, tratábase dunha motoazada e, a pesar de que estaba consciente, era necesaria a intervención dos bombeiros para liberar a súa perna e recibir asistencia médica.

Así, desde o 112 Galicia, avisouse aos Bombeiros de Monforte, así como aos profesionais de Urxencias Sanitarias de Galicia-061, que decidiron enviar unha dotación a bordo do helicóptero con base en Ourense. Ademais, foron alertados os axentes da Policía Local e da Garda Civil.