O Goberno central e a Xunta iniciaron esta semana unha nova fase da candidatura da Ribeira Sacra a Patrimonio da Humanidade –que foi aprazada a principios de xuño por un ano– co obxectivo de “mellorar todo o que sexa preciso para dar o último paso con toda a forza” e conseguir o recoñecemento por parte da Unesco.
Así o explicou o conselleiro de Cultura, Educación e Universidade, Román Rodríguez, quen mantivo unha reunión co embaixador de España ante a Unesco, Juan Andrés Perelló; a directora xeral de Belas Artes do Ministerio de Cultura e Deporte, María Dores Jiménez-Branco; e a directora xeral do Icomos, Marie-Laure Lavenir, entre outros.
Tanto o Goberno central como a Xunta buscarán intensificar o traballo e avanzar, da man do Icomos –órgano asesor da Unesco–, nun novo proceso de diálogo que “acredite coas máximas garantías os valores excepcionais” da Ribeira Sacra, segundo explica o Goberno galego a través dun comunicado.
Neste contexto, o conselleiro de Cultura anunciou a ampliación do equipo técnico que traballa na candidatura para incorporar novos perfís e a intensificación do contacto coas administracións implicadas e coa veciñanza.
“O noso propósito é inaugurar e ampliar un novo proceso de diálogo que permita intensificar a nosa estratexia e dar un novo impulso á candidatura da Ribeira Sacra”, precisou Román Rodríguez. A intención da Xunta é colaborar co Icomos para que o proxecto entre na fase final “no prazo de tempo máis breve posible” .