A acusada de estafar á súa tía en Monforte alega que o delito xa prescribiu

Nega ter enganado á anciá para que lle transferira 70.000€.

Xulgados / GC-EP

A muller de Monforte de Lemos acusada de estafar á súa tía, de avanzada idade e á que coidaba, negou os feitos no xuízo que arrincaba este xoves na sección segunda da Audiencia Provincial de Lugo. Así o avanzou a avogada da procesada, Lucía Vázquez, antes de entrar no xuízo, onde defenderá a prescrición do delito nunha cuestión previa.

No entanto, a defensa da procesada incide na inocencia da súa clienta, para a que solicita a libre absolución. “Entendemos que non existe ningún tipo de tipicidade nos feitos que se lle imputan”, incidiu. A letrada nega a estafa que Fiscalía imputa á súa defendida, para a que pide seis anos de cárcere por un delito agravado de estafa.

“Imos negar absolutamente todo, porque para nós é unha cuestión civil”, manifestou a letrada Lucía Vázquez, que puxo o acento en que a súa clienta padece problemas de saúde que ven “agravados” polo proceso xudicial ao que é sometida.

ACUSACIÓN

No seu escrito de acusación, Fiscalía asegura que a acusada se encargaba desde finais do ano 2006 dos coidados de saúde necesarios da súa tía “por atoparse parte das súas facultades físicas e psíquicas afectadas para valerse por si mesma tendo problemas de mobilidade e lucidez debido á súa avanzada idade”.

A acusación pública mantén que “a procesada valéndose polo ánimo de lucro” enganou á tía “para que lle vendese mediante documento privado de data de 19 de xaneiro de 2007 a vivenda unifamiliar”, situada en Monforte, “por un importe de 20.000 euros cando o seu valor foi taxado na cantidade de 154.094 euros e os mobles que se atopaban no seu interior taxados nun total de 3.975 euros”.

Así mesmo, o Ministerio Público tamén asegura que a acusada se aproveitou das condicións do seu familiar e da confianza que tiña con ela para convencela, en xullo de 2007, para que realizase unha transferencia ao seu favor “de máis de 70.000 euros”. A anciá faleceu o 24 de xuño de 2013 aos 86 anos de idade, deixando un testatamento asinado nove anos antes no que repartía a súa herdanza a partes iguais entre os seus sete irmáns e os seus sobriños.

DEIXAR UN COMENTARIO

Please enter your comment!
Please enter your name here