A prestixiosa Guía Peñín visitou o pasado 28 de maio a Denominación de Orixe Ribeira Sacra. Unha visita que, segundo comentou o presidente do Consello Regulador, Antonio Lombardía, “pon de manifesto a importancia e o recoñecemento dos viños da rexión no panorama vitivinícola nacional e internacional”.
Durante a sesión, dous catadores da Guía Peñín avaliaron unha ampla variedade de viños elaborados na Ribeira Sacra, contribuíndo así á valoración e difusión da calidade destes viños na súa próxima publicación. A Guía Peñín é un referente imprescindible para os amantes do viño e os profesionais do sector, e a súa visita subliña o crecente prestixio da Ribeira Sacra no mundo do viño.
Esta cata segue a recente visita do sumiller Ferran Centelles, o pasado 16 de maio. Centelles, recoñecido sumiller e colaborador do equipo elBulli, destacou a singularidade e calidade dos viños da Ribeira Sacra, reafirmando o potencial da comarca no panorama vitivinícola.
O Consello Regulador da Ribeira Sacra amosou a súa satisfacción con estas visitas, que non só validan o esforzo e a dedicación dos viticultores locais, senón que axudan a posicionar a denominación de orixe no mapa dos grandes viños.
