A Consellería do Medio Rural anunciou que “axilizará” a mobilidade de terras no Val de Lemos para “optimizar” as súas producións agrogandeiras e forestais. Así o explicou este martes a titular do departamento, María José Gómez, tras reunirse en Lugo con representantes municipais de Bóveda, Monforte de Lemos, Pantón e Sober para avanzar na colaboración institucional.
Deste xeito, o obxectivo é profundar na investigación da propiedade e na definición dos diferentes usos do territorio, mediante un catálogo de usos específico, para incentivar así o seu aproveitamento “rendible e sustentable”.
Nunha nota de prensa, a Consellería asegurou que, durante a reunión, reiterou o apoio da Xunta á modernización do regadío do Val de Lemos, reflectido, “entre outras medidas, co compromiso de destinar un total de 600.000 euros a esta finalidade”.
Así mesmo, a conselleira insistiu en defender a inclusión deste proxecto nos próximos plans de mellora da “eficiencia e sustentabilidade” en regadíos.
