O Centro do Viño foi onte escenario da presentación do libro Galiza, un país de primeira. A obra, escrita polos cambadeses Adela Leiro e Mon Daporta, ten como obxectivo a recadación de cartos para a Asociación GaliciAME (Asociación Atrofia Muscular) e poder avanzar na investigación desta doenza.

No acto de presentación estiveron Merchi Álvarez, presidenta de GaliciAME, Adela Leiro, coautora, Lara, irmá dun doente de atrofia muscular monfortino, e o Alcalde de Monforte, José Tomé Roca. A intervinte máis activa foi Adela, que desbordou simpatía, empatía, carácter e paixón pola terra. Recoñeceu que tiña a idea do libro na cabeza e por colaborar con Merchi, pola que sinte amor e admiración, propúxose telo rematado para este mes de maio, mes das Letras Galegas.

Durante a súa intervención falou do proceso creativo, de anécdotas e recoñeceu que hai cousas que, quizais, non puido abarcar na súa abrar. Finalmente, compartiu cos asistentes un traballo audiovisual resumo do traballo editorial.

Merchi explicou brevemente en que consiste a doenza e despois, tanto ela como Lara ,contaron a súa experiencia e loita diaria contra a enfermidade. No caso da monfortina Lara como irmá e coidadora. Foi un momento moi emotivo.

No inicio e no remate do acto actuou o Grupo Municipal de Gaitas do concello.

Galiza, un país de primeira.

Esta obra literaria acompañada de numerosas fotografías presente ser unha homenaxe a Galiza como país, con tanto que ofrecernos e ao que tanto queremos aínda que ás veces non o pareza. Segundo palabras dos autores “un país que moitos e moitas amamos porque é o territorio no que nacemos, o que nos proporciona os recursos para vivir, unha identidade, uns usos, un xeito de facer e un idioma para comunicármonos…”, “Galiza é un país de primeira porque ten moitas cousas das que sentir fachenda”.

Os exemplares pódense adquirir na perruquería Antoris, emprazada na Rúa Doutor Casares de Monforte.