A expedición monfortina partiu este domingo ás 10:30 horas dende a Praza da Compañía, como é habitual. O Alcalde animou así á delegación de deportistas monfortinos na súa nova participación nos Xogos do Eixo Atlántico: “estou seguro que o farán coa ilusión e ambición de acadar o mellor dos resultados.”

Os deportistas monfortinos competirán nas modalidades de Baloncesto (feminino e masculino), Fútbol 7 (masculino), Voleibol (feminino), Atletismo (masculino) e Natación (feminina e masculina). “Dende Monforte agardamos que colleiten novos éxitos para a nosa cidade, como no pasada edición na que conseguiron a medalla de prata en voleibol”, destacou o rexedor monfortino.

As modalidades deportivas nas que se competirán en xeral nos Xogos son balonmán feminino e masculino, voleibol feminino, baloncesto masculino e feminino, natación e natación adaptada, atletismo e atletismo adaptado. Como novidade desta edición, ao Fútbol 7 masculino súmase Fútbol 7 feminino. Nesta ocasión as competicións desenvolveranse paralelamente en Vila Nova de Famalicão e Braga, as dúas cidades organizadoras dos XV Xogos do Eixo Atlántico.

Como vén sendo habitual nos Xogos do Eixo Atlántico, esta edición tamén integra modalidades de deporte adaptado, coa participación de case 200 persoas, en liña coa filosofía do Eixo Atlántico de eliminar barreiras e fomentar a participación deportiva de toda a cidadanía.

José Tomé concluíu desexando que “estra 15ª edición dos Xogos do Eixo sexa todo un éxito e que os centos de mozos e mozas de Galicia e o Norte de Portugal, e por suposto de Monforte, que compiten, que o fagan dende os valores do deporte, do o esforzo e o compañeirismo. Sorte a todos, e esperámolos de volta o día 5 coa alegría de haber participado nunha competición deste nivel”.