O Concello de Monforte presume de ‘Escoba de Platino’, un galardón outorgado pola Asociación Técnica para la Gestión de Residuos, Aseo Urbano y Medio Ambiente (ATEGRUS) que premia a integración do punto limpo e do centro verde dentro do servizo municipal de recollida de residuos e limpeza viaria, unha acción impulsada dende o Equipo de Goberno o pasado 2025. A actuación conseguiu mellorar a eficiencia e coordinación na trazabilidade de residuos e sitúa a Monforte de Lemos como un referente na xestión ambiental municipal. En palabras do alcalde, “a integración dos servizos permitiu mellorar a coordinación, optimizar recursos e ofrecer unha resposta máis rápida e eficaz ás necesidades da cidadanía, ao tempo que avanzamos na protección do medio ambiente”.
A Escoba de Platino 2026 é a 4ª desta categoría que obtén o Concello de Monforte de Lemos nos últimos seis anos, tras recibir o galardón tamén nos anos 2020, 2022 e 2024. Previamente, obtivo a Escoba de Prata en 2012 e a de Ouro en 2014.
O rexedor, José Tomé, que recollerá o premio o día 10 de xuño en Madrid, sinala respecto ao mesmo que “supón un novo recoñecemento ao traballo ben feito cando no ano 2023 iniciamos o programa de implantación da recollida de lixo orgánico no Concello de Monforte, sendo un dos primeiros concellos da provincia de Lugo en facelo”.
CAMPAÑA ‘RECICLEMOS DE XEITO SOSTIBLE’
Actualmente, o Concello mantén activa a campaña informativa “RecicLemos de xeito sostible” para a mellora da xestión dos residuos orgánicos e da compostaxe no municipio que inclúe accións na rúa e nos centros educativos co obxectivo de sensibilizar a toda a poboación das vantaxes da compostaxe doméstica e da importancia de facer un bo uso do colector marrón. A iniciativa achega, de balde, colectores domésticos e composteiros individuais aos veciños e veciñas que o solicitan a través dun formulario ‘on line’ na páxina web municipal.
SERVIZOS E MELLORAS NA XESTIÓN MEDIAMBIENTAL
Dende o concello lembran a existencia do Punto Limpo, con amplo horario de atención en quenda de mañá e tarde, de 10:00 a 14:00 horas e de 16:00 a 20:00 horas, facilitando así o depósito axeitado dos residuos e reducindo significativamente o risco de verteduras incontroladas. E tamén a posibilidade de solicitar a Recollida de enseres porta a porta dispoñible mediante chamada ao teléfono 900 101 390.
Tamén se pon en valor a implementación de accións como o control de accesos e ferramentas dixitais de xestión que permiten rexistrar todos os movementos de residuos, garantindo a súa trazabilidade e mellorando a calidade da información para a toma de decisións; e a dixitalización, incorporáronse tamén melloras en eficiencia enerxética, coa instalación de iluminación LED e traballando na mellora dos accesos e da vixilancia das instalacións.
Por último, no que respecta á recollida selectiva da fracción orgánica, nas últimas semanas estase ampliando a implantación desta recollida entre os grandes produtores, especialmente no sector hostaleiro, ao que o Concello agradece a súa colaboración para mellorar a separación de residuos.
