Os Bombeiros de Monforte tiveron que evacuar a unha muller que sentiu indisposta cando camiñaba por un viñedo situado no lugar de Noveledo, na parroquia de Ribeiras de Miño, no municipio lucense de Pantón.

Segundo trasladou o 112 Galicia, os feitos sucederon sobre as 15,15 horas cando a muller camiñaba pola zona e sentiuse mareada. Nese momento, un familiar púxose en contacto coa central de emerxencias para informar da situación e, debido ao difícil acceso ao lugar onde se atopaba, foi necesario que os bombeiros se encargasen da súa evacuación.

Así, a muller foi trasladada durante aproximadamente un quilómetro polos bombeiros ata chegar á ambulancia desprazada ata o punto polo Servizo de Urxencias Sanitarias de Galicia-061. Finalmente, foi trasladada neste vehículo medicalizado ata o Hospital de Monforte de Lemos.