O Concello da Pobra do Brollón únese a outros concellos da contorna convocando un concurso de carteis para seleccionar o cartel oficial que anuncie a edición XXXII da Feira do Viño de Vilachá, evento que terá lugar a primeira fin de semana de maio.

Esta convocatoria busca estimular a creatividade das persoas participantes, sendo un reclamo máis para crear expectativas e dar a coñecer un dos eventos máis senlleiros do concello. O cartel, segundo refiren fontes do concello, “é unha peza moi visible en todas as accións de comunicación da Feira do Viño, ademais de empregarse para as etiquetas das botellas de viño que se vendan no evento”.

SOBRE AS BASES

Como se adoita facer neste tipo de concursos, unha das premisas básicas é que se valorará que os deseños reflictan o espírito da Feira do Viño de Vilachá, que se celebra no icónico conxunto de adegas medievais da Abelaira. “A feira caracterízase pola participación de adegas e colleiteiros con viñas na ribeira de Vilachá, e coa gran presenza musical grazas á animación ao longo da fin de semana de grupos de cantos de taberna“, remarcan dende o concello.

A obra presentada a concurso ten que ser unha creación propia, orixinal e inédita, non podendo estar premiada antes en ningún concurso. Amais non poderá ser ofensiva nin aludir a ningunha marca comercial. O prazo para presentar os deseños remata ás 14:00 horas do día 3 de marzo, debéndose entregar tanto impreso como en formato dixital na Casa do Concello.

Establécese un único premio de 200 euros e os participantes someteranse á decisión do curado, formado este por persoas cualificadas, e podendo tamén declarar deserto o premio. O xurado emitirá o seu fallo o día 10 de marzo.

As bases do concurso completas están publicadas na páxina web do Concello da Pobra do Brollón.