O Concello da Pobra do Brollón vén de anunciar a pregoeira da que será a XXXII edición da Feira do Viño de Vilachá os días 2, 3 e 4 de maio. Trátase de Cristina Alcalá, unha profesional cunha traxectoria profesional de máis de 25 anos ligada ao mundo da cultura do viño, nomeadamente nos ámbitos da comunicación, a docencia e a xestión cultural.
Actualmente Alcalá é membro de xurados de cata profesional a nivel nacional e internacional, formando parte tamén do Grupo de Investigación en Experiencia Turística da Universidade da Coruña, e colaborando como docente en institucións de prestixio nacional e internacional como as seguintes: o Basque Culinary Center, o Instituto IFE-Cámara de Comercio de Madrid e o Máster de Viticultura e Enoloxía da Universidad Politécnica de Madrid.
Na súa traxectoria cómpre salientar o seu papel como consultora de plans estratéxicos, formación, xestión cultural e desenvolvemento de proxectos para empresas privadas e institucións ou o desempeño –anos atrás– do cargo de Secretaria-Xerente do Consello Regulador da D.O. Ribeiro.
Tamén participa como relatora, tanto en foros do sector como en universidades e outros sectores sociais, foi colaboradora en medios de comunicación como Radio 1-RNE –con sección propia– e o xornal El País; e directora das revistas Vinum-Mi Vino e Guía del Vino Cotidiano.
Dende o Concello da Pobra do Brollón afirman que “todo o coñecemento e a paixón da pregoeira vaino transmitir no pregón o domingo da Feira ás 13:00 horas”.
PRESENTE NUNHA CATA
A pregoeira, Cristina Alcalá, guiará xunto co sumiller Juanjo Figueroa –pregoeiro nunha edición anterior– unha cata moi especial de viños de barrica, que terá lugar o sábado 3 de maio ás 13:00 h.
Baixo o título “Oralidade, pel e madeira. Percorrido polos viños de barrica de Vilachá”, estes dous profesionais guiarán esta atractiva cata á que cómpre apuntarse previamente no whatsapp 650624828. O prezo por anotarse é de 15 €, haberá 7 viños e o acto rematará cunha sorpresa musical.
