O BNG explica que esta categoría regulouse co Decreto 34/2021, pero en Monforte a xestión da HADO segue recaendo no servizo de Medicina Interna, sen contar cunha praza médica propia. “O servizo ten que chegar ao 100% da poboación e ten que se cumprir, e vostedes están incumprindo a lei”, recriminou.
“O primeiro é recoñecer que hai un problema, e se o servizo está chegando é grazas aos profesionais que están facendo posible que siga funcionando”, dixo agradecendo o inmenso labor que están facendo estes facultativos “deixándose a pel a pesar de que non son médicos específicos de HADO, e que polo tanto, o servizo estase a dar precariamente porque non dan máis”.
A este respecto denuncian que en Chantada, en Carballedo ou en Taboada non hai posibilidade de hospitalización a domicilio, “directamente non chega”.
Lamenta Suárez a recente inaguración do mamógrafo, “como se non fose un servizo esencial que levaba estragado meses”. Para o BNG, a situación no Hospital de Monforte non só repercute negativamente na atención aos doentes, senón tamén na sobrecarga do persoal médico existente, “que debe asumir funcións adicionais sen os recursos axeitados”. Para o deputado da comarca, este incumprimento é unha mostra evidente das profundas eivas na planificación sanitaria do Goberno galego”.
A falta de servizos sanitarios axeitados en comarcas envellecidas como o sur de Lugo é, para o BNG un problema que require dunha resposta urxente. “A Xunta está a incumprir co Hospital de Monforte e co conxunto da súa área de referencia. O caso do HADO é só un exemplo máis dunha situación que se está volvendo insostible”, rematou
