Un home resultou ferido este xoves en Sober ao envorcar o tractor que conducía nunha zona de monte, nun accidente para o que foi mobilizado un helicóptero medicalizado do 061.
Segundo informou o CIAE 112 Galicia, os feitos ocorreron sobre as 17,00 horas, cando un particular contactou con Emerxencias para informar de que unha persoa tivera un accidente cun tractor e que o vehículo envorcara, atopándose inconsciente o seu condutor.
O 112 Galicia comunicou os feitos a Urxencias Sanitarias de Galicia, que mobilizou o helicóptero con base en Ourense; así como aos bombeiros de Monforte, Policía Local, Garda Civil e Protección Civil de Sober.
Finalmente, os equipos de emerxencia desprazados comunicaron ao CIAE que o condutor recuperara a consciencia. Ao tratarse dunha zona de difícil acceso, mobilizouse o helicóptero do 061, que tomou terra no lugar.
