O incendio rexistrado en Folgoso do Courel afecta xa a unha superficie de máis de 200 hectáreas, segundo a última información facilitada na conta de Twitter do número 085 habilitado para alertar dun incendio forestal.
Dos lumes que se iniciaron nas últimas horas e que permanecen activos, segundo informou a Consellería do Medio Rural, o de maior afectación é o de Folgoso do Courel onde agora se eleva a superficie afectada de 100 a máis de 200 hectáreas. No entanto, precísase que se solicitou a desactivación do nivel dous ao non haber perigo para os núcleos poboacionais.
Inicialmente, expúxose debido á proximidade do lume ao lugar de Portela, na parroquia de Gundriz, no concello limítrofe de Samos. Este lume iniciouse ás 23,43 horas da pasada noite e aínda permanece activo, segundo os últimos datos facilitados por Medio Rural.
CONTROLADO O DE MONFORTE
Por outra banda, ás 05,50 horas desta madrugada quedou controlado o incendio rexistrado no concello de Monforte de Lemos, na parroquia de Marcelle, tras comezar este mércores ás 13,53 horas.
Tras unha nova medición, a superficie afectada é de 38 hectáreas, precisa a Consellería. Delas 30 son arborada e oito de monte raso. Na súa extinción, o persoal implicado é dun técnico, seis axentes, 15 brigadas, sete motobombas, sete helicópteros e catro avións, entre outros medios e efectivos.
