O pasado venres día 7 presentouse no Museo Provincial de Lugo a 13ª edición do Certame Condado de Pallares de investigación. A este concurso poderánse presentar investigacións do eido da lingüística, a historia, a arte, a arqueoloxía, a antropoloxía, a etnografía ou o folclore nos concellos do antigo Condado.

O Condado de Pallares era un dos once condados nos que se dividiu a Diócese de Lugo no século VI e abarca os concellos de Guntín, Portomarín, Taboada, Chantada e Carballedo. A Deputada de Cultura en funcións, Pilar García Porto, explicou que “o coñecemento da nosa historia, da nosa cultura, da nosa lingua e do noso patrimonio é necesario para poder conservalos”.

Quen desexe participar no certame deberá presentar o seu texto antes do 30 de setembro e deberá estar escrito integramente en galego. A extensión mínima dos traballos será de cen páxinas e o gañador recibirá un premio de 3.000 euros.