O Concello de Sober en 58 páxinas

Baixo o título “Coñece o teu concello“ preséntase unha novidade literaria, un reto para mestres, alumnos, e persoas en xeral que desexen afondar na historia destas terras dende as orixes ata os nosos días.

Libro 'Coñece o teu concello'. Foto: M. Prieto

O Colado do Vento vén de sacar unha unidade didáctica, “Coñece o teu concello”, onde se rescata o máis representativo da zona facendo un percorrido polas distintas épocas históricas e sobre o patrimonio.

Esta publicación foi pensada para axudar aos educadores a poñer en valor diante o alumnado todo o noso. Seguindo as pautas suxeridas, os nenos e nenas achegaranse a diferentes eidos que conforman un territorio, neste caso o de Sober. Coñecerán a xeografía, as aldeas que forman o Concello, aprenderán a definir os principais elementos, rescatarán tradicións, monumentos, lugares de interese, patrimonio, lendas, festas, gastronomía, todo o que fai que unha localidade sexa única e, ao mesmo tempo, integrada no global.

Esta publicación foi pensada para axudar aos educadores a poñer en valor diante o alumnado todo o noso

O libro, que no seu día foi elaborado por Alfonso Campos, aló polo 1995, agora reelaborado e actualizado, tenta implicar ás nenas e nenos no coñecemento do entorno xa que, segundo din os responsables da publicación “o neno e nena aprenden mellor se os coñecementos se axustan ao que hai no seu entorno… o ámbito rural é, en moitas facetas, un lugar privilexiado, que ensina ao neno e nena dunha forma integrada… conviven con hórreos, fornos, igrexas, pombais, muíños, animais, cultivos… e os avós son fonte de tradición que os engarza co pasado real e o recreado”.

Seguindo as pautas, os exercicios suxeridos, e as inevitables visitas ás paxinas web recomendadas, os nenos e nenas, e todas as persoas que o desexen, descubrirán a grande riqueza patrimonial que se agocha no Concello de Sober: petróglifos, castros, muíños, pombais, cerámica, asentamentos romanos, igrexas, lendas, e tamén a importancia dos oficios, moitos deles só vivos na memoria dos maiores.

Os nenos e nenas, e todas as persoas que o desexen, descubrirán a grande riqueza patrimonial que se agocha no Concello de Sober

Así o entende tamén o profesorado do CEPI plurilingüe Virxe do Carme de Sober, que fai a seguinte valoración sobre esta publicación:

Contribúe a que o alumnado coñeza e valore os elementos históricos e xeográficos da súa contorna. Amosa un percorrido moi ben estruturado polas diferentes épocas históricas no noso concello.

Achega ao alumnado ao coñecemento da historia, xeografía, e cultura a partir do que pode observar na súa contorna o que facilita a súa aprendizaxe polas características de razoamento que ten a estas idades.

É moi completa porque ofrece gran cantidade de recursos didácticos e bibliografía.

Estamos agradecidos de que nos faciliten este traballo tan interesante que podemos levar a cabo co noso alumnado nas áreas de Ciencias Sociais e Ciencias da Natureza”.

Os socios e socias do Colado do Vento recibirán o agasallo dun exemplar desta publicación e terán dereito a mercar outro ao prezo simbólico de 5 euros. Para os non socios o prezo será de 10 euros e en breve tamén se poderá mercar en librerías. Mentres, pódese adquirir poñéndose en contacto coa asociación coladodovento@gmail.com. Recibirán exemplares o CEPI Virxe do Carme de Sober e a Biblioteca Municipal.

Sen dúbida, unha ambiciosa aventura. Para coñecer e amar o que temos preto, abondan 58 páxinas.

DEIXAR UN COMENTARIO

Please enter your comment!
Please enter your name here