O DHG Team de Sarria organiza o Descenso Urbano de Sarria, catalogado pola Unión Ciclista de España como o mellor descenso urbano do país. Este ano celebrou a súa sétima edición reunindo a máis de 5.000 persoas, entre participantes e público. O DHG Team tamén organiza o Open Galego que este ano chegou á novena edición e congregou en Sarria a un cento de persoas.
Ademais destes eventos de carácter competitivo, o clube organiza unha ruta cicloturista aberta a todo o público, na que este ano participaron un cento de veciños e que transcorreu polos concellos de Sarria, Páramo e Paradela e celebra o Día da Bicicleta, un evento dirixido pais e nenos que no 2108 reuniu a máis de 400 persoas.
O Clube conta con 80 integrantes e actividades totalmente consolidadas na axenda deportiva do Concello de Sarria. Para apioar estas iniciativas a Deputación fai unha achega de 6.000 euros. Desde o organismo provincial aseguran que “o DHG Team tense convertido nun axente dinamizador social e económico da vila, pois ao longo do ano organiza varias citas xa consolidadas e cunha importante repercusión a nivel galego e estatal”.