A Casa do Concello de Sober acolle hoxe luns 22 de xullo, ás 10:30 h., a presentación dun seminario sobre as pegadas do Camiño de Inverno nas paisaxes da Ribeira Sacra. Ademais do alcalde, Luis Fernández Guitián, estará Isabel Aguirre, directora da Escola Galega da Paisaxe.

A organización correrá a cargo da Fundación Juana de Vega, a través da Escola Galega da Paisaxe, e enmárcase no programa O Teu Xacobeo, posto en marcha por Turismo de Galicia.

A primeira edición de este workshop, coordinada polo doutor Mario Crecente, terá lugar do 2 ao 6 de setembro na Casa Grande de Rosende, en Sober, e estará dedicada ao tramo entre Quiroga e Monforte de Lemos desta vía xacobea.

O obxectivo deste seminario é analizar as paisaxes e patrimonios da Ribeira Sacra e propoñer estratexias de delimitación, intervención e desenvolvemento a través dun traballo multidisciplinar con distintos axentes.