A Consellería de Cultura e Turismo impulsará a ampliación do Museo Xeolóxico Municipal de Quiroga a través dun acordo aprobado onte no Consello e polo que a Xunta de Galicia achegará 80.000 euros.
O principal obxectivo é promover o turismo no Concello de Quiroga e nos de Ribas de Sil e Folgoso do Courel, municipios que conforman o Xeoparque Mundial da Unesco Montañas do Courel.
O museo, inaugurado en 2011, está dedicado á divulgación, estudo e protección dos valores xeolóxicos da Comarca de Quiroga e ademais da súa importante traxectoria para impulsar o patrimonio cultural, ten o valor engadido de ser o único en Galicia dedicado a esta temática. Na actualidade, conta con cinco salas dedicadas cada unha delas á formación do territorio en Galicia, á historia paleontolóxica galega e evolución da vida, á idade dos xeos, ás primeiras ocupacións humanas na zona e á minaría.
O centro museístico recibe 7000 visitas ao ano e constitúe un recurso divulgativo de primeiro nivel para dotar de potencialidade e impulsar o Xeoparque Mundial da Unesco Montañas do Courel, declarado como tal recentemente. A súa ampliación, evidentemente, reforzará o Xeoparque e axudará a consolidalo no futuro.
A ampliación do museo enmárcase na Estratexia do Turismo de Galicia 2020 que sinala como un dos seus retos o aproveitamento do potencial dos recursos naturais de Galicia, que permiten construír un destino único e diferencial. Dende a Xunta tamén están a traballar no desenvolvemento das accións incluídas no Plan Estratéxico do Xacobeo 2021, de xeito que a localización do Museo Xeolóxico municipal de Quiroga no Camiño de Inverno é un argumento máis a favor da súa ampliación.
