Este mércores, día 8 de maio, terá lugar na Praza España de Monforte o tradicional concurso dos Maios, encontro no que se prevé gran participación de centros escolares e particulares monfortinos que queiran colaborar coa tradición con algunha creación. A concentración, na que os participantes amosarán as súas elaboracións vexetais e florais, realizarase ás 17:30 h. para acto seguido facer lectura das coplas.
A convocatoria para participar foi feita xa días atrás polo concello e as solicitudes de inscrición no concurso “non competitivo” dos maios e mais das coplas, poden facerse ata o 7 de maio ás 14:00 h. Todos os concursantes, polo feito de participar, levarán un incentivo económico de 75 euros.
Os Maios percorrerán as rúas da cidade para rematar á hora prevista, 17:30, na Praza España. Xa alí procederán a interpretar as coplas.
E da tradición pasamos ao deporte. O domingo, 12 de maio, celebrarase en Monforte a IV edición das Olimpíadas Escolares. Organizan este evento a ANPA IES Daviña Rey e a ANPA A Gándara, participando os seguintes centros escolares: Colexio Novo, CEIP A Gándara, IES Daviña Rey, Colexio Ferroviario, Torre de Lemos e o IES Río Cabe.
Participarán uns 500 nenos e nenas que competirán en 5 modalidades deportivas diferentes: fútbol, Baloncesto, voleibol, atletismo e natación.
O Concello de Monforte colabora neste evento poñendo a disposición un gran número de instalacións deportivas, como son as Pistas de Atletismo Municipais, o Pavillón da Pinguela, a Piscina Climatizada Municipal e o Pavillón dos Institutos, e tamén facéndose cargo da entrega de medallas aos gañadores das competicións cun custe duns 1.200 euros.
Ao final da xornada, sobre as 19:00 h. está prevista a entrega de trofeos e unha festa final con chocolatada para asistentes e deportistas.
recollida solidaria
Durante toda a xornada aquel que o desexe poderá deixar material escolar de xeito solidario que irá destinado a ser repartido entre as familias máis necesitadas de Monforte. As entregas realizaranse no Pavillón dos Institutos, lugar onde se xogan as finais de Futbol Sala, e no Pavillón Municipal da Pinguela, onde se xogan os partidos de voleibol.
Todo o material que se recolla será repartido entre as AMPAS dos seis centros educativos participantes nestas IV Olimpíadas Escolares e estas, á súa vez, distribuirán dito material entre os alumnos e alumnas máis necesitados ao inicio do vindeiro curso escolar.
