Tras as eleccións deste pasado domingo, 28 de abril, doce dos 16 senadores galegos que hai en Madrid estrearanse na Cámara alta.
No que respecta ao sur de Lugo, as dúas caras novas que irán a Madrid representando ao PP son Rosa Arza e Manuel Lorenzo Varela. O senador restante, e primeiro na lista, será José Manuel Barreiro que renovará a súa acta para a nova lexislatura.
Rosa Arza -Quiroga, 1988- é actualmente Presidenta de Novas Xeracións na provincia de Lugo e dende 2016 exerce como Concelleira de Mocidade e Turismo no Concello de Quiroga.
Manuel Lorenzo Varela -Chantada, 1950- é o actual alcalde de Chantada co partido Independentes Terra do Asma (INTA). Abandonou o PP en 2007 para crear esta formación política e agora, tras volver ao partido este ano, non só logra a súa acta como senador, senón que encabezará a candidatura do PP en Chantada para as próximas municipais.
