O Carballedo C.F. vén de rematar a súa primeira tempada na Liga Galega de Fútbol Feminino. Os resultados no marcador non foron os mellores, pero para este grupo de mozas a vitoria máis importante foi a familia que construíron dentro e fóra do campo. Falamos coa capitá do equipo, María Varela, para coñecer un pouco máis sobre este ilusionante proxecto.
Cal é a valoración que fai o equipo dos resultados desta campaña?
Está claro que os resultados non foron os mellores, pero gañamos nas experiencias a nivel pesoal. Cando comezamos este proxecto non nos coñeciamos, e hoxe non pasa unha semana sen que nos vexamos, somos coma unha familia. Á fin e ao cabo, o factor humano é o que realmente nos importa, máis ala do que se reflita no marcador.
Como respondeu a afección do Catro Ventos durante a tempada?
A verdade é que é a primeira vez que hai un equipo feminino en Carballedo, polo que non se pode comparar a afluencia ao estadio con outros anos. As gradas non estiveron cheas, pero sempre había xente apoiándonos e en partidos puntuais, como os derbis e o Partido contra o cancro, a resposta da xente foi moi positiva. De feito, nese partido solidario recaudamos case mil euros. En definitiva, sempre nos sentimos moi arroupadas polas nosas familias e amigos, pero tamén polos entrenadores, a directiva e o presidente.
Consideras que o movemento feminista e a crecente importancia das reivindicacións do 8-M tivo algo que ver co auxe que vive o fútbol feminino na comarca e, en xeral, en todo o país?
Si, de seguro. Eu levo xogando ao fútbol desde que teño uso de razón, adoito dicir que este deporte foi o meu primeiro amor, e sempre competín con rapaces. Cando eu era nena era moi atípico ver un equipo de fútbol feminino. Gustaríame pensar que o noso caso e tantos outros son só un comezo para acadar a igualdade no fútbol e en moitos outros ámbitos nos que aínda hai tanto por avanzar, como o fogar ou a parella.
O Carballedo C.F. participou nunha triangular benéfica en favor de Chantada contra o cancro. Cres que os equipos deportivos deberían desenvolver máis esa faceta social?
Desde logo. O deporte é saúde e se se pode recaudar diñeiro para unha causa benéfica con el por que non facelo. Ademais, no noso caso axudámoslle a unha asociación contra o cancro, unha enfermidade á orde do día. Eu vivina de forma moi próxima e para min foi algo especial, xa que a miña nai é presidenta da asociación Chantada contra o cancro e ela mesma tivo que superar esta doenza. Outro aspecto positivo deste tipo de iniciativas é que nos partidos benéficos coñeces xente e, aínda que eu non puiden xogar ese día, compartimos moitos momentos coas rapazas da SD Chantada e do EFF Rosalía. Ao final gañou a asociación e gañamos nós no terreo persoal.
A nivel persoal, que che aportou participar deste equipo?
Eu levaba sen estar federada dende os 18 anos, e agora que teño 32 enriqueceume moitísimo poder entrenar outra vez, e máis con este corpo técnico e estas compañeiras. Aprendín moito de todas as rapazas e das persoas que nos estiveron guiando, tanto a nivel técnico como persoal. Hai xente moi boa no equipo e iso é co que quedo, grazas a este equipo son un pouco mellor persoa. Non sei que será de min mañá, pero teño claro que o equipo no que vou xogar sempre que poida será o Carballedo CF.
Sábese xa se haberá novas incorporacións ou baixas no plantel?
Aínda non teño esa información. Con todo, algunha compañeira verase obrigada a abandonar o proxecto por saúde ou por incompatibilidade co traballo. Iso si, que deixen de ter ficha non significa que non sigan no vestiario e no equipo a nivel persoal. Tamén estamos abertos a recibir a novas rapazas con ilusión e ganas de facer deporte e pasalo ben.
Cales son as vosas perspectivas de cara á seguinte tempada?
De cara ao ano que vén esperamos mellorar coa axuda dos entrenadores, que nos van formando pouco a pouco. En principio non nos vemos loitando polo ascenso pero, se o corpo técnico cre en nós, por que non? De momento a nosa meta é descansar e pasar un bo verán. Se podemos tentaremos ir a algún torneo, seguir entrenando e facer unha boa pretempada. O que é seguro é que a familia do Carballedo seguirase xuntando e compartindo momentos aínda que non haxa partidos.
