No encontro deste sábado a conselleira de Medio Ambiente, Territorio e Vivenda, Anxos Vázquez, interesouse por diferentes necesidades e demandas do Concello de Folgoso do Courel e comprometeuse coa alcaldesa, Lola Castro, a analizar a posibilidade de colaborar na creación dunha área recreativa en Mogoxe.

A Xunta destacou, nun comunicado, que a rexedora local explicoulle á conselleira que a definición desta nova zona á beira do río Lor “consistirá na roza e limpeza do terreo e nunha limpeza e saneamento do muro de contención próximo á estrada LU-651”.

Lola Castro lembroulle á representante de Medio Ambiente que a posible creación da área recreativa é “unha demanda dos veciños de Folgoso”, e engadiu que “este ámbito de esparexemento permitirá definir unha zona apta para o baño e o lecer, fixando ao mesmo tempo atractivos turísticos que ofrecer aos visitantes deste concello”.