O próximo xoves día 1 de agosto comezará na Pobra do Brollón o ciclo de cinema ao aire libre “O Camiño na Gran Pantalla”. Todos os xoves de agosto proxectarase ás dez da noite na área recreativa de Samugueiros un filme relacionado co Xacobeo. O primeiro será “O Apóstolo”, unha película de animación gañadora de seis Premios Mestre Mateo. Está realizada coa técnica do stop-motion e dirixiuna Fernando Cotizo.
A seguinte película, que se poderá ver o día 15, é “Pelegrinaxes”, do italiano Simone Saibene. Trátase dunha mestura entre documental e ficción e recrea o percorrido que fixeron en 1927 os membros do Grupo Nós Otero Pedrayo, Vicente Risco e Ben-Cho-Shey entre Ourense e Santo André de Teixido.
O xoves 29 será o turno de “The Way” (“O Camiño”), dirixida polo realizador estadounidense Emilio Estévez. Esta cinta está protagonizada polo seu pai, Martin Sheen, cuxas orixes se atopan no municipio pontevedrés de Parderrubias. “The Way” está recoñecida por ser un dos instrumentos clave para a popularización do Camiño de Santiago en Norteamérica.
Haberá, tamén, dúas proxeccións máis de carácter solidario. O sábado día 3 proxectarase na Casa da Cultura a curtametraxe documental “La Niña Bonita”, que retrata a realidade dos refuxiados. O custe da entrada será de 2 euros, e a recadación será destinada integramente a Acnur.
