O Alcalde de Taboada, Ramiro Moure, a Deputada de Turismo, Pilar García Porto, o delegado territorial da Xunta de Galicia, José Manuel Balseiro Orol, e o Presidente da Asociación Cultural as Fachas, Manuel Fidalgo, presentaron este mércores na Escola de Castelo de Taboada a tradicional Festa da Queima das Fachas.
A deputada García Porto sinalou que é unha cita cultural “que permite manter viva unha tradición importante, non só polo que representa a nivel cultural, que o ten, senón a nivel etnográfico. Unha tradición importante para a contorna, pero tamén para toda Galicia, porque quedan moi poucas celebracións destas características”. “Este tipo de eventos dinamizan social e economicamente a comarca”, subliñou.
Trátase dunha festa de tradición celta, que se mantivo durante a época romana, ata o punto de sobrevivir ata os nosos días. Asistir á Queima das Fachas, declarada de Festa de Interese Turístico de Galicia, é unha viaxe á cultura galega máis ancestral. Na festa quéimanse arredor dunha trintena de fachas enriba do castro.
Programación
Sábado 7
21:00 h. Comezo da festa cunha gran pulpada e amenizada por un grupo de gaitas.
23:30 h. Momento no que se procede á tradicional ‘Queima das Fachas’. A continuación, verbena para dar continuidade festiva a esta gran noite.
Domingo 8
13:30 h. Misa solemne en honor a Santa María e sesión vermú. Pola noite, máis actuacións musicais.
Luns 9
13:30 h. Misa solemne e sesión vermú con animación de actuacións musicais.
