O Concello do Incio desenvolve unha nova campaña de recollida de plásticos agrícolas procedentes das explotacións de diversos puntos do municipio. O Concello facilita este traballo con puntos de recollida cerca das propias explotacións. Os plásticos poderán depositarse nos puntos habilitados a tal efecto en cada unha das parroquias ata o día 7 de outubro, posto que a recollida se fará a partir do día 8 de outubro. Unha vez rematada a recollida non se poderán depositar máis plásticos ata novo aviso.

O alcalde, Héctor Corujo, explica que o Concello se suma a esta iniciativa como unha forma de colaborar co medio ambiente e para darlle unha solución aos veciños e veciñas para retirar este tipo de plásticos das súas explotacións de xeito gratuíto.

A cantidade de plástico agrícola (plástico e bolsas de silo, plástico de invernadoiro) que se xera en Galicia ao longo dun ano é de aproximadamente 7.700 toneladas.

A práctica habitual do vertido ou da incineración de xeito incontrolado supón un problema medioambiental, que orixina un deterioro progresivo e acumulativo do contorno, tendo ademais en conta o impacto paisaxístico derivado da proliferación de puntos de abandono destes materiais.