O número 66.212 resultou agraciado co cuarto dos oito quintos premios do Sorteo Extraordinario de Lotaría de Nadal, dotado con 60.000 euros á serie.
Cantado ás horas 10.39 no terceiro arame da cuarta táboa, caeu en varias localidades galegas, entre elas en Monforte de Lemos, Santiago de Compostela, Muxía, Pontevedra e os municipios pontevedreses de Salceda de Caselas e O Porriño.
O Sorteo Extraordinario de Nadal reparte este 22 de decembro 2.380 millóns de euros en premios, e os agraciados co ‘Gordo’ recibirán 400.000 euros ao décimo, con 680 millóns de euros a repartir con este premio principal.
Os premios do Sorteo Extraordinario da Lotaría de Nadal de importe inferior ou igual a 20.000 euros non estarán suxeitos ao gravame especial sobre os premios de determinadas lotarías, segundo os límites que fixou a Lei de Orzamentos Xerais do Estado do 2018.
SEGUNDO E TERCEIRO PREMIO, EN VILALBA E A FONSAGRADA
O número 10.989, agraciado co segundo premio do Sorteo Extraordinario de Lotaría de Nadal, dotado con 1.250.000 euros á serie, repartiu sorte na localidade lucense da Fonsagrada e en Vigo. O número foi cantado ás 11.31 horas no primeiro arame da sexta táboa.
O número 750 resultou agraciado co terceiro premio do Sorteo , dotado con 500.000 euros á serie. O número foi cantado ás 11.11 horas no quinto arame da quinta táboa. En Galicia, deixou medio millón de euros repartidos entre Vilalba e O Grove, así como un premio de 50.000 euros en Santiago de Compostela.
