As primeira imaxes que puideron ver os veciños e veciñas nas súas casas a través da televisión municipal foron as dunha viaxe a Arxentina que realizaban os alcaldes de Ribas de Sil, Folgoso do Courel e Quiroga dentro da ‘operación Morriña’ da Xunta de Galicia.
Tamén a Radio Municipal cumpriu este ano 25 anos. Uns meses antes, o 2 de abril de 1994, coincidindo coa XII Feira do Viño, comezaba a súa andaina no 107.3 a Radio Municipal de Quiroga.
Durante estes 25 anos, nos que estas dúas canles non deixaron de emitir, tentáronse manter os dous principios cos que naceron: o máis lúdico, entreter; e o máis responsable, achegar a todos os veciños e veciñas o acontecido día a día neste municipio.
Con motivo desta celebración, o vindeiro sábado día 28, o Auditorio Municipal acollerá unha gala coas actuacións do quirogués, Julio Ferrín e o músico e cantante galego, Roi Casal. Esta última forma parte do programa “O teu Xacobeo” da Xunta de Galicia. A gala comezará a partir das sete da tarde cun repaso a estes 25 anos.
