Está claro que hai ganas de feira, e paso a paso os concellos da Ribeira Sacra van organizando as primeiras no paseniño camiño cara a denominada “nova normalidade”.

Segundo nos informan do Concello de Castro Caldelas, “este luns celebrouse o mercado con total responsabilidade dos feirantes, dos veciños e veciñas e de visitantes que se achegaron á Feira do 18 no Castro”. Explican tamén que os servizos de Protección Civil e Emerxencias do concello controlaron que se cumpriran as distancias entre postos agrarios e alimentarios, que non houbese xente amoreada e ao remate procederon á desinfección de colectores de lixo, papeleiras, prazas, rúas e entradas de establecementos.

A alcaldesa, Sara Inés Vega, comentaba tamén que o público portouse moi ben, a xente mantivo as distancias esperando a súa quenda para ser atendida e tanto a hostalería como as pulpeiras respectaron as directrices de xeito responsable.

Como anécdota, contar que Xosé Miguel Pérez, alcalde do concello veciño de San Xoán de Río, estivo presente na feira e publicou no seu perfil de Facebook: “hoxe, vendo a responsabilidade e o bon facer da xente que acudíu á feira en Castro Caldelas, podemos indicar que estamos preparados en San Xoán de Río para voltar ás feiras”.