Os Premios Alecrín 2020 están dedicados ao 60 Aniversario da tradución da Biblia ao Galego polo caldelao Manuel Casado Nieto, Presidente máis lonxevo do Centro Galego de Barcelona no que estivo exercendo o cargo durante 17 anos.
Sara Inés Vega, alcaldesa de Castro Caldelas, lembra que esta institución da emigración galega na cidade condal contou ao longo da súa historia con outros presidentes caldelaos, entre eles Olegario Sotelo Blanco.
O evento celebrouse ás 12:00 h. no Patio de Armas do Castelo e foi presentado polo locutor de radio galego-catalán Xosé Carlos. Interviñeron o ex-presidente do Centro Galego de Barcelona e Asesor de Emigración da Deputación, Manuel Carrete, a cantante Uxía con pezas interpretadas en catalán e en galego, e a propia alcaldesa que pechou o acto.
Os Premios Alecrín chegan a este concello por terceira vez e nesta ocasión cun detalle especial ao recibir o consistorio a doazón dun cadro pintado polo malagueño Francisco Naranjo, autor de carteis da Semana Santa Andaluza e restaurador das obras da Catedral de Málaga baixo a dirección de Pedro de Mena. O cadro foi doado pola FEGALCAT (Federación de entidades culturais galegas en Cataluña) e entregado de mans da súa secretaria Marisol Pérez, de Olegario Sotelo -ex-presidente do Centro Galego de Barcelona, e Henrique Fernández -Presidente-fundador da Asociación Rosalía de Castro de Cornellá-. O devandito cadro, segundo acordo presentado ao Pleno polo Grupo de Goberno, será entregado ao Santuario dos Remedios da propia vila. O cadro representa a alegoría de San Sebastián, patrón de Castro Caldelas e figura relevante da Festa dos Fachós dende 1751.
Os galardoados, figuras relevantes da cultura, as letras, o deporte, a música, a empresa privada, a viticultura,… foron: A Lira de Ribadavia, o debuxante Siro, a Fundación Vicente Risco, Justo Molinero -Radio Tele Taxi-, o ciclista Óscar Pereiro, a cantante Uxía, Juan Luis Méndez da Adega Vía Romana, o escritor Amador Castro Moure, o cura de Cacabelos, Jesús Álvarez, o Pazo Mariñán-Adegas Monterrei, Aura seguros, a Casa do Patrón de Lalín, García & García, Celtic Estores e a sociedade Cooperativa Agrícola Gistredo Castaña de Parede.
