O Alcalde de Monforte de Lemos, José Tomé Roca, asinou este mércores pola mañá a Acta de ocupación definitiva dos terreos que serán destinados á construción do futuro Parque do Hospital. 

O Alcalde destaca que “hoxe seguimos avanzando na consecución dun importante proxecto construtivo que fará que a cidade de Monforte teña un novo parque público no Barrio do Hospital, dotando a esta parte da cidade dun novo servizo público e que ademais contribuirá a paliar o déficit de estacionamento que ten o Hospital Comarcal tanto para os veciños que van a consulta como os que van de visita”. 

O novo parque público do Barrio do Hospital terá un carácter integral con varias zonas de céspede, unha zona de xogos infantís, paseos peonís lonxitudinais e transversais, estará dotado de varios elementos biosaudables de ximnasia para maiores e finalmente contribuirá a paliar o déficit de estacionamento na zona do Hospital contando co aproximadamente 60 prazas de estacionamento para vehículos e tamén contará con estacionamentos para motos, para bicicletas e prazas para minusválidos.

A superficie da parcela que albergará este parque será de aproximadamente 6.212 metros cadrados, unha extensión moi importante e que ven dar un servizo público do que carece esa zona da cidade.