O PP asegura que a sesión plenaria celebrada pola corporación provincial este martes puxo de manifesto que para os grupos que integran o goberno da Deputación (PSOE e BNG) “o máis importante é o uso da institución como ariete fronte á Xunta. Tamén de novo quedou en evidencia que o talante do presidente da Deputación, o socialista José Tomé, é facilmente mellorable en todo o que ten que ver coa participación da oposición”, afirman os populares, que ao remate do pleno de hoxe amosaban a súa satisfacción porque se lles aprobaran dúas mocións.

Castiñeira explica: “A primeira das nosas mocións aprobadas, coa abstención de socialistas e nacionalistas e os votos a favor do PP, ten por obxectivo instar ao Goberno do Estado a que cambie de estratexia enerxética, para baixar o recibo da luz, tan importante  para as nosas empresas, os nosos veciños e os nosos concellos”.

O portavoz popular destacou que, “por outro lado, aprobamos unha moción na que o PP insta a que a Deputación integre na súa rede a residencia de maiores de Sarria; neste caso o PP votou a favor, o BNG abstívose e votaron en contra os deputados do PSOE”.

Á vista da actitude do presidente da Deputación e dalgún dos comentarios que fixo, Castiñeira sinala: “Esperamos que o señor presidente cumpra o que o pleno lle está establecendo e non como deu a imaxe no día de hoxe no que parece que di que aquí apróbese o que se queira que despois fago eu o que me apetece”