O delegado apuntou que “o Goberno responde á relevancia de Monforte cuns investimentos que están á altura do concello”. E destacou que Monforte é agora protagonista do maior investimento do Goberno en Galicia tras finalizar a construción da Alta Velocidade con 546 millóns de euros para a modernización do corredor ferroviario entre Ourense e Lugo. Adif executará nos próximos tres anos 71 contratos para poñer ao día a liña e conectala coa alta velocidade que pasará por Ourense. “Nestes momentos xa se atopan en execución a renovación da vía entre Monforte de Lemos e Lugo e o túnel de Oural, que suman máis de 80 millóns de euros”.
Dentro deste proxecto, José Miñones lembrou que esta semana Adif adxudicou a adecuación da estación de tren de Monforte ás novas condicións do corredor. E engadiu que son “3 millóns de euros para a renovación completa deste equipamento” aos que haberá que sumar os 6 millóns previstos para a supresión dos primeiros pasos a nivel do municipio, que configurarán un novo espazo urbano nesta área de Monforte.
No Mosteiro de San Vicente do Pino supervisaron os traballos de restauración executados polo Ministerio de Cultura, que investiu 534.148 euros para a conservación e restauración das pinturas e retablos desta igrexa. A actuación rematou este pasado mes setembro.
Reserva da biosfera da Ribeira Sacra
O Ministerio para a Transición Ecolóxica e o Reto Demográfico destina 6,4 millóns de euros para financiar proxectos de desenvolvemento sostible nas Reservas da Biosfera e Monforte de Lemos poderá beneficiarse deles unha vez que a Ribeira Sacra accedeu en setembro a esta figura de protección. Este compromiso traducirase en iniciativas enfocadas cara o emprego verde e asentadas no territorio, co que se obterá tamén un efecto positivo sobre a poboación asentada neste espazo.
O delegado apuntou que a mellora ambiental e da calidade de vida da poboación de Monforte de Lemos recibe preto de 5 millóns de euros do Goberno de España. Monforte beneficiouse de 2,8 millóns de euros das axudas do Ministerio para a Transición Ecolóxica cos que está abordando a renovación da iluminación pública.
A Confederación Hidrográfica do Miño-Sil está abordando co Concello a segunda fase da renovación do saneamento e depuración das augas, para a que a CH Miño-Sil comprometeu 1,9 millóns de euros e a tramitación dos contratos. “Nestes momentos xa estamos a traballar para definir as necesidades e redactar o proxecto, paso previo á súa licitación”, indicou o delegado.
O delegado do Goberno insistiu na necesidade de dotar ás poboacións das vilas de servizos públicos de calidade. Dentro desta liña, está a renovación completa da oficina da Seguridade Social, “unha actuación moi necesaria dado o estado actual do inmoble e que beneficiará as 55.000 persoas que atende esta sede”. E engadiu que a obra está xa en contratación por un importe de 545.000 euros. Por outra banda os responsables estatais sinalaron que estase a redactar o proxecto de adaptación do edificio para a nova comisaría de Policía.
