Na Asemblea que vén de celebrar Interior Galego Vivo decidiron constituirse como organización política para acudir ás eleccións locais de 2023, mantendo a autonomía e identidade de cada unha das agrupacións que participan dela.
A plataforma continúa a nutrirse de colectivos veciñais que, dende unha perspectiva cívica, teñen interese en favorecer que haxa grupos de traballo en cada municipio, que poidan reunirse e traballar en cuestións sociais, aínda sen o obxectivo de presentar unha candidatura municipal. A tal efecto, IGV constituirase tamén como asociación.
Nesta quinta asemblea, abordáronse as problemáticas do rural a través de varias mesas de traballo, nas que se aprobou afondar en cuestións como: necesidade de fomentar o transporte compartido no rural; a aposta por servizos sociais cen por cen públicos e a erradicación de macroresidencias; a necesidade de que estes servizos estean a un máximo de trinta minutos en coche de calquera das nosas parroquias; a implementación de ciclos formativos do sector agrogandeiro nas zonas rurais e que, en todo caso, teñan vinculación directa con traballos propios da zona.
Tamén abordaron a necesidade dunha fiscalidade que discrimine positivamente á poboación rural para contribuir a frear a caída demográfica, “traducida por exemplo en bonificacións fiscais na vivenda habitual ou na transmisión patrimonial de vivendas con valor inferior a 190.000 euros en concellos avellentados ou despoboados”, sinalan.
Para impulsar estes acordos, constituiuse unha coordinadora ampliada e reforzada na que se integrarán novas persoas e proxectos municipalistas e asociativos tanto de Lugo como de Ourense, sobrepasando a trintena de concellos.
