A recreación da moenda tradicional das olivas no Muíño de Bendilló segue espertando expectación e sorprendendo moito aos visitantes, dándolle este carácter etnográfico un valor singular e diferencial.
A mostra do AOVE quirogués tivo lugar este 29 de maio e durante toda a mañá estivo á venda no recinto feiral o aceite elaborado por cinco olivicultores do municipio: José Manuel López Maseda, Jesús Bao Mondelo, Jesús Arias Rodríguez, Manuel Mondelo Rodríguez e Pedro Soto Losada. Todos eles coincidiron en que as vendas foron moi boas e tamén en que os anos de pandemia fixeron que se perdera un pouco a afluencia a esta mostra. Aínda así, sinalaron que a xente que acude vén coa intención de mercar aceite.
NAVA CASTRO E JOSÉ TOMÉ, ENCARGADOS DA INAUGURACIÓN
Como novidade desta edición, a mostra contaba cunha inauguración oficial. Os encargados do simbólico corte de cinta foron a directora de Turismo de Galicia, Nava Castro, e o Presidente da Deputación Provincial de Lugo, José Tomé. Tanto Nava Castro como José Tomé coincidiron en que é preciso apoiar este tipo de festas; no caso da directora de turismo porque axudan moito a que calquera persoa que se achegue a Galicia tamén visite Quiroga e no caso do presidente da Deputación porque axudan a que non se perda poboación no rural.
Outro punto no que tamén coincidiron é na importancia de que se recoñeza oficialmente o Aceite de Quiroga buscando unha protección europea ben sexa a través dunha Indicación Xeográfica Protexida ou a través dunha Denominación de Orixe. Nesta distinción é na que se está traballando en Quiroga dende hai anos e que agora AGACAL, a Axencia Galega de Calidade Alimentaria, asumiu o compromiso de axudar como anunciou o seu director José Luís Cabarcos.
Rematada a Mostra, o Alcalde de Quiroga, Julio Álvarez, facía unha valoración positiva do evento de exaltación do aceite local, tanto polas vendas como pola promoción e pola ampla representación institucional.
