A sección segunda da Audiencia Provincial de Lugo xulga este martes 29 de novembro a un home acusado de almacenar e compartir material pedófilo desde o seu domicilio no municipio de Monforte de Lemos, polo que se enfronta a unha petición da Fiscalía de oito anos de prisión.

Segundo relata o Ministerio Fiscal, como consecuencia das investigacións realizadas pola Brigada de Investigación Tecnolóxica da Comisaría xeral da Policía Nacional, tívose coñecemento da existencia de varios arquivos que circulaban por internet en diferentes direccións e que contiñan material de contido inequívoco pornográfico infantil.

No marco desta investigación, determinouse que polo menos un usuario realizaba a procura, descarga e compartición de arquivos de carácter pedófilo a través de dous IP asociadas a unha liña telefónica domiciliada en Monforte de Lemos.

Tras identificar o usuario do computador desde onde se estaban realizando ditas descargas, acordouse a entrada e rexistro no establecemento rexentado polo acusado, así como no seu domicilio.

Alí, localizaron o computador desde onde se realizaron as conexións a distintos arquivos de contido pedófilo que o acusado, “con pleno coñecemento, procedeu a compartir a través do programa de intercambio de arquivos Emule“.

Deste xeito, continúa o escrito de Fiscalía, permitía “conscientemente” a descarga dos arquivos previamente obtidos por el a outros usuarios da rede, que se identificaron en diferentes momentos entre os días 30 de xaneiro de 2019 e 20 de marzo de 2019, así como entre o 4 de maio de 2019 e o 4 de xuño de 2019.

Co material intervido analizado, comprobouse que o acusado, baixo o nome de usuario xerado polo programa Emule, descargouse de maneira consciente material de contido pedófilo, no que se utilizaba a menores de 16 anos, numerosas fotos e vídeos multimedia.

Do mesmo xeito, comprobouse que o acusado non só almacenaba o material de contido pedófilo, senón que procedía a distribuír e compartilo entre os distintos usuarios do programa P2P.

Por estes feitos, constitutivos dun delito de corrupción de menores, a Fiscalía sinala que procede impor ao acusado a pena de oito anos de prisión. Ademais, solicita que se lle impoña a medida de liberdade vixiada por tempo de seis anos e a participación en programas formativos de educación sexual.