Este sábado, 3 de decembro, na Televisión Española estréase, 820 Km. Las siete vías de peregrinación por la provincia de Lugo, un documental impulsado pola Deputación Provincial para dar a coñecer a riqueza e os recursos turísticos da provincia, a que conta cun maior número de quilómetros de rutas xacobeas de toda España.
A través de 820 km de peregrinación, o historiador e arqueólogo Javier Gómez Vila e o fotógrafo Xosé Reigosa convidan a percorrer o rico e variado patrimonio dos camiños lucenses a través das súas xentes e as súas paisaxes. Ademais de pasar polas rutas declaradas Patrimonio da Humanidade -o Camiño Francés, o do Norte e o Primitivo-, ou polo Camiño de Inverno, os protagonistas amosan na súa viaxe outras rutas que aspiran ao recoñecemento oficial de vías de peregrinación a Santiago, como son a Vía Künig, o Camiño do Mar, e a Vía Regia.
O documental sobre os Camiños de Santiago forma parte dunha serie de tres producións audiovisuais, cunha duración de 50 minutos cada unha, impulsadas pola Deputación co obxectivo de promocionar a provincia. A gastronomía na provincia de Lugo, coa presenza de profesionales da Asociación de Cociñeiros da Provincia; e Rutas científicas pola provincia de Lugo, que percorre a Serra do Xistral, o Xeoparque Montañas do Courel ou as xeorrutas pola costa Cantábrica, son as temáticas dos outros dous traballos audiovisuais que se emitirán na televisión pública.
