A Asociación de Comerciantes, Empresarios, Profesionales e Autónomos de Sarria (ACES) presentou a campaña de Nadal nun dos establecementos pertencentes ao colectivo, “Duet Moda“, ubicado na rúa Calvo Sotelo. A presentación da campaña correu a cargo de Ricardo Arias, Presidente da ACES, que explicou as actuacións previstas para este ano, acompañado por Iria Vila empleada do establecemento. 

Dende a Asociación queren dar vida ao Nadal, embelecendo as rúas coa iluminación e os escaparates dos comercios con decoración do nadal, creando un ambiente navideño. O comercio e hostalaría da vila desexa transmitir alegría e ilusión nestas datas. 

O vindeiro xoves 15 e ata o 31 de decembro terán de novo “O LOTÓN“, na súa sexta edición. As compras entre as datas sinaladas farán que un/unha cliente do CCU de Sarria gañe 1.000€, que terá que gastar de novo no comercio asociado. Esta é a actividade central da campaña, cun premio moi apetecible entre os consumidores do CCU. Mil euros que premiarán a fidelidade dos consumidores ao pequeno comercio. A persoa premiada terá que facer as súas compras antes do día de Reis. O sorteo terá lugar no bulevar da Calvo Sotelo o día 4 de xaneiro. 

Ademais, os establecementos asociados poderán participar un ano máis no concurso de escaparates que ten como obxectivo a posta en valor dos negocios locais a través das votacións do público nas redes sociais. Dende a Asociación búscase a maior implicación do comercio local e hostalaría, cos veciños e veciñas da Comarca así como que veciñanza apoie ao comercio de proximidade.