A Deputación editará 1.000 exemplares dunha guía sobre o románico da comarca da Ulloa e outros 1.000 dunha centrada na zona dos Ancares, o Courel, e a comarca de Sarria, así como un total de 2.000 trípticos complementarios a estas publicacións. O contrato foi adxudicado a Producciones 60 Ráfagas S.L. por 36.179€ e un prazo de entrega de 11 días. Estas dúas guías forman parte dun proxecto máis amplo, composto de catro volumes que farán un percorrido por este estilo arquitectónico ao longo de toda a provincia.
A institución provincial ten publicada a correspondente á comarca da Ribeira Sacra, “agora publicaremos as referidas á Ulloa, e aos Ancares, O Courel e Sarria, e neste ano 2023 sacaremos á correspondente ás comarcas de Lugo, A Chaira e A Mariña, coa cal quedaría completada a serie”, aseguran Pilar García Porto.
O vindeiro xoves, 19 de xaneiro, a institución provincial presentará na Feira Internacional de Turismo (FITUR) a nova campaña de promoción turística que, co lema Lugo, provincia románica, está precisamente centrada na promoción do románico como recurso turístico, e que protagoniza o actor soberino premiado cun Goya no ano 2022, Chechu Salgado.
