A organización do Festival tiña anunciado que abandonaba a proxecto pola falta de apoios para continuar, daquela desde o concello de Sarria comunicaba que tentarían aumentar a colaboración e esta semana faino a Vicepresidencia da Deputación.
Efrén Castro explicou que “o Esmorga Fest converteuse nestes anos nun festival de referencia na música independente, con público de toda Galiza e do resto do Estado e un recoñecemento unánime da prensa especializada. A súa traxectoria é un activo cultural que temos que aproveitar, especialmente, nunha vila coma Sarria, á marxe dos circuítos da industria musical. Na xuntanza desta mañá ofrecemos aos organizadores o apoio económico necesario para facer viable unha nova edición, e darlle continuidade a un festival que conta ademais cunha gran implicación e apoio da veciñanza e do tecido asociativo e empresarial de Sarria”.
Garántese así unha nova edición do festival, que se vén celebrando desde 2015 – coa excepción do 2020, ano de explosión da pandemia, e un formato reducido en 2021- con carteis que mesturan bandas recoñecidas e grupos emerxentes da música independente.
