Ante o anuncio de cancelación deste acto, a concelleira de Cultura, Reyes Abella, lamenta a decisión dos promotores do Esmorga Fest de renunciar á organización do festival e destaca o apoio e colaboración brindado polo goberno local nas últimas edicións “na medida das posibilidades orzamentarias da Concellería de Cultura”
Reyes Abella destaca que o Esmorga Fest lograra posicionarse como “un festival de referencia a nivel nacional no eido da música independente”, e cuestiona “a escasa colaboración das administracións autonómica e provincial para posibilitar a súa continuidade, unha non cumprindo cos compromisos adquiridos e outra acumulando retrasos nos pagamentos”.
Asegura que desde o seu departamento “sempre se valorou a importancia do Esmorga Fest para Sarria e trasladámoslle aos organizadores a nosa predisposición a incrementar algo a aportación económica do concello, pero sempre dentro dunha lóxica, xa que sería inasumible esgotar nun só evento gran parte do orzamento anual para a organización das actividades culturais”, argumenta a edil. “Ogallá esta decisión sexa simplemente unha paréntese e non un punto final na historia do Esmorga Fest”, conclúe.