As seguintes charlas serán a cargo do artesán X.M. Seixas, cunha exposición e conversa sobre máscaras (venres 10), e o investigador local Felipe Castro, que falará sobre o Oso de Salcedo e outras tradicións desta parroquia da Pobra (venres 17). Todas as charlas comezan ás 20:15 h na Casa da Cultura ‘Olga Novo’ e a entrada é libre.

Como parte da programación municipal, haberá tamén dous obradoiros infantís de compadres e comadres. Serán os martes 7 e 14 ás 17:00 na Casa da Cultura. A participación é libre e gratuíta.

Os propios días de compadres e comadres (os xoves 9 e 16) haberá concurso destas figuras, con varias categorías individuais e colectivas, e realizarase a queima das figuras.

O último evento da programación municipal será o sábado 18 co desfile de disfraces, comparsas e carrozas, acompañado pola charanga RQR. O desfile rematará na Casa da Cultura coa entrega dos premios tanto de compadres e comadres como do desfile. 

O sábado á noite arranca o Entroido na parroquia de Salcedo, que continuará ata o martes 21. O sábado e domingo pola noite son as representacións teatrais a cargo dos veciños e veciñas. O pregón, así como os disfraces de campo e o baile das madamas e danzantes terán lugar o domingo pola tarde. O luns é o día do evento máis icónico do Entroido salcedán, a saída do Oso.