O IES A Pinguela, CEIP Plurilingüe de Monforte, CEIP de Quiroga, IES Xograr Afonso Gómez de Sarria e o IES Sanxillao de Lugo foron os centros lucenses que estiveron presentes na entrega dos Premios de Boas Prácticas de Educación Inclusiva que se celebrou na Cidade da Cultura en Santiago de Compostela o pasado 25 de abril.
O acto estivo presidido por D. Román Rodríguez González, Conselleiro de Cultura, Educación, Formación Profesional e Universidades, e Judith Fernández Novoa, Directora Xeral de Ordenación e Innovación Educativa.
A Xunta de Galicia recoñece o traballo dos centros educativos galegos co Premio “Boas Prácticas de Educación Inclusiva” co obxectivo de impulsar a atención á diversidade e a inclusión educativa, difundir as boas prácticas así como recoñecer o labor que, neste sentido, está a desenvolverse actualmente nos centros educativos. Trátase, deste xeito, de promover unha escola que garanta o estímulo das capacidades de todo o alumnado e contribúa á creación de contornas e culturas inclusivas.
EDUCACIÓN INCLUSIVA
A educación inclusiva ten como propósito acadar o máximo desenvolvemento posible de todo o alumnado, identificando, eliminando ou minimizando, no seu caso, as barreiras derivadas de condicións persoais ou sociais que en determinados momentos poden limitar o seu proceso de aprendizaxe. Todo o anterior na convicción de que todo o alumnado pode aprender cando se lle outorgan as oportunidades axeitadas, se favorece o seu acceso e participación nelas e se estimulan as capacidades, potencialidades e responsabilidades sociais.
